Breaking news

शासकीय रेखाकला परीक्षा 2016चे निकाल जाहीर

मुंबई(प्रतिनिधी)महाराष्ट्र शासनाच्या कला संचालनालायामार्फत सप्टेंबर 2016 मध्ये घेण्यात आलेल्या शासकीय एलिमेंटरी व इंटरमिजिएट रेखाकला परीक्षांचे निकाल जाहीर करण्यात आले आहेत.

या परीक्षा प्रामुख्याने माध्यमिक शाळांतील विद्यार्थ्यांसाठी होत्या. अखिल भारतीय स्तरावर महाराष्ट्र, गोवा, मध्यप्रदेश, उत्तरप्रदेश या राज्यातून एकूण 947 केंद्रामध्ये या परीक्षा आयोजित करण्यात आल्या होत्या. सप्टेंबर 2016 मध्ये एलिमेंटरी आणि इंटरमिजिएट परीक्षांना मिळून एकूण 4 लाख 8 हजार 505 विद्यार्थ्यांनी नावे नोंदविली होती. एलिमेंटरी परीक्षेस 2 लाख 20 हजार 992 विद्यार्थ्यांनी नावे नोंदविली होती तर त्यापैकी 2 लाख 3 हजार 75 विद्यार्थी परीक्षेस बसले होते. यापैकी 16 हजार 205 विद्यार्थ्यांना ए श्रेणी, 37 हजार 501 विद्यार्थ्यांना बी श्रेणी, 1 लाख 37 हजार 680 विद्यार्थ्यांना सी श्रेणी मिळाली. या परीक्षेत एकूण 1,91,386 विद्यार्थी उत्तीर्ण झाले.

इंटरमिजिएट परीक्षेसाठी एकूण 1 लाख 87 हजार 513 विद्यार्थ्यांनी नावे नोंदविली यापैकी 1 लाख 77 हजार 80 विद्यार्थी परीक्षेस बसले. 15 हजार 92 विद्यार्थी ए श्रेणीत, 32 हजार 245 विद्यार्थी बी श्रेणीत 1 लाख 14 हजार 800 सी श्रेणीत उत्तीर्ण झाले. एकूण 1 लाख 62 हजार 137 विद्यार्थी उत्तीर्ण झाले. एलिमेंटरी परीक्षेत 94.24 टक्के तर इंटरमिजिएट परीक्षेत 91.56 टक्के विद्यार्थी उत्तीर्ण झाले. एलिमेंटरी परीक्षेत मुंबई केंद्राची विद्यार्थीनी तीर्था शेट्टी तर इंटरमिजिएट परीक्षेत पुणे केंद्राची आर्या देशमुख राज्यस्तरावर प्रथम क्रमांकाने उत्तीर्ण झाले आहेत.

Related Photos